विदर्भ न्यूज एक्सप्रेस
प्रतिनिधी / बल्लारपूर (Ballarpur) : शुक्रवारच्या रात्री एक भरधाव हायवा ट्रक बल्लारपूर- आलापल्ली मार्गावरील येनबोडी येथील एका घरात संरक्षण भिंत तोडून घरात घुसला. सुदैवाने कोणतीही जीवितहानी झाली नाही. मात्र, घरमालक हेमंत भगत यांची संरक्षण भिंत तुटल्याने आणि अंगणात ठेवलेल्या दुचाकीचे मोठे नुकसान झाले आहे.
शुक्रवारच्या मध्यरात्री बल्लारपूरकडून आलापल्ली जाणारा हायवा क्रमांक एमएच ३३ टी ४४१० सुसाट वेगात होता. येनबोडी जवळ येताच चालकाचे वाहनावरील नियंत्रण सुटले आणि रस्ता दुभाजक ओलांडून आणि सुरक्षा जाळी तोडून ट्रक हेमंत भगत यांच्या घरात घुसला अंगणात ठेवलेली दुचाकी क्रमांक एमएच ३४ बिएन ७७१३ चा चुराडा करीत ट्रक घराच्या भिंतीवर जाऊन आदळला. सुदैवाने रात्रीची घटना असल्याने मोठी दुर्घटना टळली.
येनबोडी येथे शाळा आणि कनिष्ठ महाविद्यालय असल्याने सकाळपासून संध्याकाळपर्यंत येथे विद्यार्थ्यांची वर्दळ असते. घटनेच्या वेळी भगत कुटुंबीय गाढ झोपेत होते. पंरतु, आवाजाने त्यांनी घराबाहेर धाव घेतली, शेजारीही धावून आले. घटनेनंतर चालकाने पळ काढला होता. घटनेची माहिती बल्लारपूर पोलिसांना देण्यात आली. ठाणेदार उमेश पाटील व सहकाऱ्यांनी घटनास्थळ गाठले. लोहखनिज वाहून नेणाऱ्या ट्रकांमुळे या मार्गावर अपघात वाढले असून, यापूर्वी रस्त्यालगच्या घरांमध्ये ट्रक घुसल्याच्या घडल्या आहेत. राष्ट्रीय महामार्गावर भरधाव वेगाने धावणाऱ्या वाहनांमुळे दिवसेंदिवस अपघाताच्या मालिकेत वाढ होत आहे. या मार्गावर रोज कुठे ना कुठे अपघात घडत आहेत.