Latest Posts

विवाहित मुलीलाही अनुकंपा नोकरीचा हक्क : सुप्रीम कोर्टाचा महत्त्वपूर्ण निकाल

विदर्भ न्यूज एक्सप्रेस 
वृत्तसंस्था / मुंबई (mumbai) : शासकीय सेवेत असताना मृत पावलेल्या कर्मऱ्यांच्या जागी विवाहित मुलीलाही अनुकंपा तत्त्वावर नोकरीचा हक्क आहे. मुलीचे लग्न झाल्याच्या कारणावरून तिचा हक्क नाकारू शकत नाही, असा महत्त्वपूर्ण निर्वाळा देत सर्वोच्च न्यायालयाने मुंबई उच्च न्यायालयाच्या निर्णयावर शिक्कामोर्तब केले.

या निकालामुळे नाशिक येथील तरुणीला दहा वर्षांनी पित्याच्या जागी नोकरी मिळण्याचा मार्ग मोकळा झाला.

नाशिक महापालिकेने अनुकंपा तत्त्वावर नोकरी नाकारल्यानंतर शुभांगी विठ्ठल कमोदकरने मुंबई उच्च न्यायालयात धाव घेतली होती. त्यावर अनुकंपा तत्त्वावरील नोकरीच्या प्रतीक्षा यादीत भावाच्या जागी तिचे नाव अंतर्भूत करण्याचे आदेश न्यायालयाने पालिकेला दिले होते, मात्र त्या आदेशाचे पालन केले नाही. त्यामुळे शुभांगीने पालिकेला अवमान नोटीस दिली. त्या नोटिसीला आव्हान देत पालिकेने सर्वोच्च न्यायालयात स्पेशल लिव्ह याचिका दाखल केली होती. त्यावर न्यायमूर्ती सतीशचंद्र शर्मा आणि न्यायमूर्ती प्रसन्न वराळे यांच्या खंडपीठापुढे शुक्रवारी अंतिम सुनावणी झाली. यावेळी शुभांगीतर्फे ॲड. यशोदीप देशमुख यांनी बाजू मांडली. त्यांनी पालिकेच्या याचिकेवर जोरदार आक्षेप घेतला. त्याची दखल घेत सर्वोच्च न्यायालयाने शुभांगीचा अनुकंपा नोकरीवरील दावा वैध ठरवला आणि पालिकेची याचिका फेटाळली.

न्यायालय म्हणाले –
– सरकारी कर्मचाऱ्यांच्या पश्चात कुटुंबीयांची आबाळ होऊ नये म्हणून कुटुंबातील एका सदस्याला अनुकंपा तत्त्वावर नोकरी देण्याचे धोरण आहे. या धोरणाची योग्य अंमलबजावणी करणे हे सरकारचे कर्तव्यच आहे.
– मृत सरकारी कर्मचाऱ्यांची पत्नी तिचा सांभाळ करण्याच्या दृष्टीने अनुकंपा तत्त्वावरील नोकरीसाठी मुलगा वा मुलीपैकी कुणाच्याही नावाला संमती देऊ शकते.
– मृत कर्मचाऱ्यांची पत्नी जर बदललेल्या कौटुंबिक परिस्थितीत मुलाऐवजी मुलीला अनुकंपा नोकरी देण्याची इच्छा व्यक्त करीत असेल तर जीआरमध्ये तरतूद नसल्याचा तांत्रिक मुद्दा उपस्थित करून मुलीला नोकरी नाकारता येणार नाही.
– अनुकंपा नोकरीच्या दावेदारांना सात-आठ वर्षे वाट पाहायला लावणे योग्य नाही. या काळात परिस्थितीत बदल होणे स्वाभाविक आहे. त्या स्थितीत नोकरीचा दावा नाकारू शकत नाही.

Latest Posts

Don't Miss